Ae Humnawan

Kyun chhed diya mujhko ki ab main rukun nahi likhti jaaun,
banke kavita kuchh chhand kabhi, teri ankhon mein tikti jaun,
ab tum likh do mujhko dil pe apne is kadar ae humnawan,
jab tak yaadein hu zinda rahun, fir halke halke mit ti jaun..

.

Main albeli mehki firti kabhi isi sheher kabhi kisi dagar,

Mujhko na samjho awaara, main toofanon si nahi magar

Ab tum mujhko roko thaamo apne andar ae humnawan,

Jab tak mehkun tere saath rahu, fir haule se mukti paun,

Main chanchal jal ki parchhai, yun kal kal behti jaati hun,

Na des koi na pardesi, ik sagar khoje jaati hun,

Ab tum mujhko bhar lo khud mein aise ae mere humnawan,

Jab tak sheetal hu tere paas rahun, fir dheere se galti jaun,

Main mitti ki wo gudiya hun, jismein sapno ka hai dera,

Par samay ke nirdayi haathon ne mere prano ko aa ghera,

Ab tum mujhko rakh lo apne ghar mein aise ae humnawan,

Jab tak dil behle rakhna tum, fir chupke se ghisti jaun,

Aur jab tak yaadein hun zinda rahun, fir halke halke mit ti jaun

Maa ka aanchal

Lo bheeg gaya mera aanchal, fir yaad mujhe wo aaya hai,

Mere rookhe naino mein fir wo banke aah sa chhaya hai,

Fir gehen manan main karti hun wo chala gaya aakhir kis or,

Sarhad pe seena taan khada wo amar ho gaya atal kishor,

Mujhse na nibha saka wo un vachano ko saare tod gaya,

Aur jeevan sandhya kaal mein apni maa ko kaise chhod gaya,

Jis maa ne swem balidaan dia, tujhe bharat ki dhaal banaya tha,

Aur haath chhuda apna tujhko dharti ka laal banaya tha,

Usko tu nirmam haal mein kaise chhan chhan marta chhod gaya,

Aur do do maaon ke aanchal ko tu ek hi kasht se jod gaya,

Par fir bhi garv ka wo akash hum sab ke hriday mein chhaya hai,

Ki hum dono hi ne saubhagya se ik shaheed putra jo paya hai,

Hai gad gad mera mann tere karmo ne paar lagaya hai,

Lo bheeg gaya mera aanchal, fir yaad mujhe wo aaya hai..

Jeevan ka parichay

Jo na meethi na pheeki hai, 

main us dariya ka paani hun,

Jiske kuchh naazuk pehlu hain, kismet se wahi kahaani hun,

Koi kehta dekha hai tumko,

Koi pehchane har baat meri,

Koi dekh ke andekha kare,

Koi puchhe fir kya jaat teri,

Un sabko kya main batlaun,

main isi lok ki prani hun,

Jiske kuchh naazuk pehlu hain, kismet se wahi kahani hun,

Kabhi  sneh sanjo dun daman mei,

Kabhi dukh ke badal garja dun,

Kabhi sookhe mann ke baagon mei,

Fir prem rang sa barsa dun,

Main to sabke karmo se hun, 

dharmon se main anjaani hun,

Jiske kuch naazuk pehlu hain, kismet se wahi kahani hun,

Main jeevan hun, mera parichay,

to unse hain jo jeete hain,

Aur unse main santusht nahi,

Jo aansu peete rehte hain,

Mujhko jeena jo seekh gaye, 

unki  main sakhi purani hun,

Jiske kuchh nazuk pehlu hain, kismet se wahi kahani hun…

Naari

Astitvaheen wo murjhayi,

Sisakti uski parchhaai,

Wo andhkaar mein simti hai,

Aur dur dasha mein lipti hai,

Naino mein fir pighla saawan,

Jhar jhar fir dhaara behti hai,

Wo uljhi samay ki guthhi mein,

Pal pal bas kehti rehti hai,

Ki aur nahi ab aur nahi,

Bas sehen mujhe ab aur nahi,

Na kathputli na gudiya hun,

Na sehenshakti ki pudiya hun,

Main jeevit mujhe na tadpaao,

Koi purushon ko ab samjhao,

Ki main mamta ka saagar hun,

Par hridaya mera bhi sakht hai.

Na bhool ai nadaan purush,

Ki mujhme bhi ik purush ka rakt hai,

                                                                           

                                                                                

Kahin chingaari ko hawa mili,

To dhwast tujhe kar jaungi,

Main naari hun, haari nahi,

Jo yun peechhe hat jaungi,

Itihaas gawaah hai himat ka,

jab main jhansi ki rani thi,

purushon ko tab bhi choor kia,

tab bhi to wahi kahani thi,

Main sharirik bal mein chhoti,

Par aatmshakti ki aandhi hun,

Main hi durga main hi kaali,

Main hi sona va chaandi hun,

Mat joojh mere junoon se ab,

Main khaak tujhe kar jaungi,

Fir tere abhimaan ke shav par,

Main vijay pataaka lehraungi.