Mera sab saman kho gaya...

Aaj mann udaas hai, jeevan bhi ro gaya,
kya karun, kya kahun,
Mera sab saman kho gaya,

Qad mera itte se itna kab ho gaya,
Sab jagah dekha, mera jhula bhi kho gaya,
Pariyon ki dunia ka sapna khud so gaya,
Kya karun, kya kahun,
Mera sab saman kho gaya,

Jhuthmuth ke kisso ka pitara bhi kho gaya,
Chanda mama ka koi aur dulara ho gaya,
Aasmaan se toda wo tara bhi kho gaya,
Kya karun, kya kahun,
Mera sab saaman kho gaya,

Mera motiyon ka wo pyara sa mala bhi kho gaya,
Hawa wala neela gubbara bhi kho gaya,
Mera cheeni mitti ka wo pyala bhi kho gaya,
Kya karun, kya kahun,
Mera sab saman  kho gaya,

Meri pyari gudiya ka kahin aur byah ho gaya,
Meri kagaz ki kashti ka koi aur kinara ho gaya,
Wo tairti thi jisme wo sagar bhi kho gaya,
Kya karun, kya kahun,
Mera sab saman kho gaya,

Badalon se mera jhagda kab ho gaya,
Indradhanush pe jaane ka rasta bhi kho gaya,
Ret pe banaye makano ka naksha bhi kho gaya,
Kya karun, kya kahun,
Mera sab saman  kho gaya,

Meri gullak ko phoote zamana kab ho gaya,
Meri chavanniyon ka wo khazana bhi kho gaya,
Aaj phir guldasta tod ke bhaagti hun main,
Par chhupne ka mera wo thikana hi kho gaya,
Ab samaj mein aaya, kaise sab ho gaya,
Is badhte samay mein mera bachpan hi kho gaya,

Kya karun, kya kahun,
mera sab saman kho gaya.....